கோவை, அக்.16: கோவை மாவட்ட மக்களின் நீண்டகால அறிவுத் தேவையைப் பூர்த்தி செய்யும் வகையில், உலகத் தர வசதிகளுடன் கூடிய மாபெரும் ‘பெரியார் அறிவுலகம்’ நூலகம் மற்றும் அறிவியல் மையத்தை முதலமைச்சர் ஜோசப் விஜய் மக்கள் பயன்பாட்டிற்குத் திறந்து வைத்தார்.
கோவை, காந்திபுரம் சிறைத்துறை மைதானத்தில் 301 கோடியே 71 லட்சம் ரூபாய் மதிப்பீட்டில், தரை மற்றும் ஏழு தளங்களுடன், 1,98,000 சதுர அடி பரப்பளவில் அதிநவீன வசதிகளுடன் இந்த ‘பெரியார் அறிவுலகம்’ கட்டப்பட்டுள்ளது.
தரைத்தளத்தில் 356 இருக்கைகளுடன் கூடிய நவீன கலையரங்கம், மாற்றுத்திறனாளிகளுக்கான சிறப்பு நூலகம், 90 இருக்கைகள் கொண்ட கோளரங்கம் மற்றும் விண்வெளிப்பயண மின்தூக்கி ஆகியவை அமைக்கப்பட்டுள்ளன.
முதல் தளத்தில் வரவேற்பறை மற்றும் அறிவியல் மையமும், இரண்டாம் தளத்தில் குழந்தைகளுக்கான நூலகம் மற்றும் சொந்தப் புத்தகங்களைப் படிக்கும் பிரிவும் ஏற்படுத்தப்பட்டுள்ளன. மூன்றாம் தளத்தில் இளைஞர்களின் வேலைவாய்ப்பை உறுதி செய்யும் போட்டித் தேர்வுகளுக்கான நூலகமும் நிர்வாக அலுவலகமும் செயல்படுகின்றன. நான்காம் தளத்தில் தமிழ் புத்தகப் பிரிவு மற்றும் பருவ இதழ்கள் பிரிவும், ஐந்தாம் மற்றும் ஆறாம் தளங்களில் ஆங்கிலப் புத்தகப் பிரிவு மற்றும் தொழில் முனைவோர் மையமும் உருவாக்கப்பட்டுள்ளன.
ஏழாம் தளத்தில் அறிவியல் மையம், திறந்தவெளி முற்றம் மற்றும் மின் நூலகம் அமைக்கப்பட்டுள்ளதுடன், மேல் தளத்தில் விண்வெளி அதிசயங்களைக் காணும் வகையில் 100 இருக்கைகள் கொண்ட வான்நோக்கு மையமும் அமைக்கப்பட்டுள்ளது.
