கோயம்புத்தூர் உக்கடம் புதிய பேருந்து நிலையப் பகுதியில் பல ஆண்டுகளாக வசித்து வந்த மக்கள் நகர்ப்புற வளர்ச்சிப் பணிகளுக்காக கடந்த 2018-ம் ஆண்டு அப்புறப்படுத்தப்பட்டனர். அவர்களுக்கு 18 மாதங்களில் நிரந்தர வீடுகள் கட்டித் தரப்படும் என உறுதியளிக்கப்பட்டதாக கூறப்படும் நிலையில், 8 ஆண்டுகள் கடந்தும் பல குடும்பங்களுக்கு வீடுகள் வழங்கப்படவில்லை என புகார் தெரிவிக்கப்பட்டுள்ளது.
தற்போது புல்லுக்காடு பகுதியில் தகரத் தகடுகளால் அமைக்கப்பட்ட தற்காலிகக் குடியிருப்புகளில் 250க்கும் மேற்பட்ட குடும்பத்தினர் வசித்து வருகின்றனர். இந்தக் குடியிருப்புகளில் குடிநீர், கழிப்பறை, சுகாதாரம் மற்றும் பாதுகாப்பு உள்ளிட்ட அடிப்படை வசதிகள் போதுமானதாக இல்லை என மக்கள் தெரிவிக்கின்றனர்.
தகரக் கொட்டகைகளில் கோடை காலத்தில் அதிக வெப்பம் நிலவுவதால் குழந்தைகள் மற்றும் முதியவர்கள் சிரமப்படுவதாகவும், குழந்தைகளுக்கு தோல் பாதிப்பு மற்றும் அலர்ஜி போன்ற பிரச்னைகள் ஏற்படுவதாகவும் மக்கள் தெரிவித்துள்ளனர்.
எல் நினோ தாக்கத்தால் தமிழகத்தில் வெப்பம் அதிகரிக்கும் சூழல் நிலவும் நிலையில், கோவையிலும் தகரக் கொட்டகைகளில் வசிக்கும் குழந்தைகள் கடும் வெப்பத்தால் பாதிக்கப்படும் அபாயம் உள்ளது.
இதற்கிடையே, நிரந்தர வீடுகள் கிடைக்கும் வரை பாதுகாப்பான தற்காலிகக் குடியிருப்புகள், சுத்தமான குடிநீர், போதுமான கழிப்பறைகள், மருத்துவ வசதி மற்றும் பாதுகாப்பு ஏற்பாடுகளை தற்போதைய அரசாவது ஏற்படுத்தி தரும் என நம்புவதாக மக்கள் தெரிவித்தனர்.
