கோவையின் பல்வேறு பகுதிகளில் தொடர் கொள்ளை, வழிப்பறி மற்றும் கொலைச் சம்பவங்களில் ஈடுபட்டு வந்த 9 பேர் கொண்ட கும்பலை குனியமுத்தூர் போலீஸார் கைது செய்தனர்.
கடந்த டிசம்பரில் குனியமுத்தூரில் கல்லூரி மாணவர்களை கத்திமுனையில் மிரட்டி நகை, பணம் பறித்த கும்பல், போலீஸாரை மிளகாய்ப் பொடி தூவி தாக்கிவிட்டு காரில் தப்பியது.
பின்னர் தேனியில் எஸ்.எஸ்.ஐ., வீட்டில் 100 சவரன் நகைகளை கொள்ளையடித்த கும்பல், டெல்லியில் தலைமறைவானது. கடந்த மாதம் விமானம் மூலம் தமிழகம் திரும்பியவர்கள், சிவகங்கை மாவட்டம் கீழடியில் ஒருவரை கொலை செய்துவிட்டு கோவை வந்ததாக போலீஸார் தெரிவித்தனர்.
தொடர் கண்காணிப்பில் ஈடுபட்ட குனியமுத்தூர் ஆய்வாளர் தலைமையிலான போலீஸார், கும்பலின் தலைவன் உட்பட 9 பேரை சுற்றிவளைத்து கைது செய்தனர். அவர்களிடம் இருந்து கத்திகள், வாகனங்கள் மற்றும் கொள்ளையடிக்கப்பட்ட நகைகள் பறிமுதல் செய்யப்பட்டன. கைது செய்யப்பட்டவர்கள் கோவை மத்திய சிறையில் அடைக்கப்பட்டனர்.
