கோவை, அக்.12: ஆர்.எஸ்.புரத்தில் மலையாள கோல்ட் ஸ்மித் வெல்ஃபேர் அசோசியேஷன் சார்பில் ஓணம் பண்டிகை கோலாகலமாகக் கொண்டாடப்பட்டது. கலையரங்கத்தில் தொடங்கிய ஊர்வலத்தில், பாரம்பரிய உடைகளில் ஆண்கள், பெண்கள், குழந்தைகள் என ஏராளமானோர் குடும்பத்துடன் பங்கேற்றனர்.
கேரளாவின் பாரம்பரிய செண்டை மேளம், புலி களி ஆட்டம் மற்றும் தமிழகத்தின் கரகாட்டத்துடன் நடைபெற்ற ஊர்வலம், ஆர்.எஸ்.புரத்தின் முக்கியச் சாலைகள் வழியாக சுமார் ஒரு கிலோ மீட்டர் தூரம் சென்றது.
மேளதாளங்களுடன் நடைபெற்ற ஊர்வலத்தைச் சாலையோரம் நின்ற பொதுமக்கள் ஆர்வத்துடன் கண்டு ரசித்தனர். ஊர்வலம் மீண்டும் கலையரங்கத்தை அடைந்ததைத் தொடர்ந்து, பாரம்பரிய ஓணம் விருந்து மற்றும் பல்வேறு கலை நிகழ்ச்சிகள் நடைபெற்றன.
