கோவை சிறுமுகை வனப்பகுதியில் காலில் இரும்புக் கம்பி சிக்கி காயமடைந்த சுமார் 25 வயது பெண் யானையை வனத்துறையினர் ட்ரோன் மூலம் கண்காணித்து மீட்டனர்.
பெத்திக்குட்டை, உளியூர் காப்புக்காடு பகுதியில் நடக்க முடியாமல் தவித்த யானையின் இடது முன்னங்காலில் இரும்புக் கம்பி ஆழமாக சிக்கியிருந்தது கண்டறியப்பட்டது.
இதையடுத்து மாவட்ட வன அலுவலர் தலைமையில் 60-க்கும் மேற்பட்ட வனப்பணியாளர்கள், வேட்டைத் தடுப்புக் காவலர்கள், கும்கி யானைகள் மற்றும் 5 கால்நடை மருத்துவர்கள் கொண்ட குழுவினர் சிகிச்சை மேற்கொண்டனர்.
ட்ரோன் மூலம் யானையின் நடமாட்டத்தை கண்காணித்த வனத்துறையினர், தகுந்த நேரத்தில் மயக்க ஊசி செலுத்தி இரும்புக் கம்பியை அகற்றி காயத்துக்கு சிகிச்சை அளித்தனர். பின்னர் மயக்கம் தெளிந்த யானை மீண்டும் வனப்பகுதிக்குள் சென்றது.
