தேனி சிறையில் இருந்து 17 கைதிகள் தப்பியோடிய தகவல் கிடைத்ததும், அவர்களைப் பிடிக்க காவல்துறையினர் தீவிர நடவடிக்கைகளை மேற்கொண்டனர். இதற்காகப் பல்வேறு குழுக்கள் அமைக்கப்பட்டு, மாவட்டத்தின் முக்கியப் பகுதிகளில் வாகனத் தணிக்கை தீவிரப்படுத்தப்பட்டது.
மேலும், ஆயுதப்படை, தமிழ்நாடு சிறப்புக் காவல் படை மற்றும் சிறப்பு இலக்குப் படையினர் தேடுதல் பணியில் ஈடுபடுத்தப்பட்டனர். தப்பியோடிய கைதிகள் பதுங்கியுள்ள இடங்களைக் கண்டறியும் வகையில், ட்ரோன்கள் மூலமாகவும் கண்காணிப்புப் பணி மேற்கொள்ளப்பட்டது.
24 மணி நேரத்தில் 13 பேர் சிக்கினர்
காவல்துறையினரின் தீவிர நடவடிக்கையால், 24 மணி நேரத்திற்குள் 13 கைதிகள் பிடிபட்டனர். தொடர்ந்து மேற்கொள்ளப்பட்ட தேடுதல் நடவடிக்கையில் மேலும் 2 கைதிகள் பிடிபட்டனர்.
இதையடுத்து, இதுவரை மொத்தம் 15 கைதிகள் பிடிபட்டுள்ளனர். தப்பியோடிய 17 பேரில் மீதமுள்ள 2 கைதிகளையும் பிடிப்பதற்கான நடவடிக்கைகள் தொடர்ந்து நடைபெற்று வருகின்றன.
