கோவை, அக்.12: மத்திய, மாநில அரசு உயர் பணிகளில் சேர விரும்பும் கிராமப்புற மற்றும் பொருளாதாரத்தில் பின்தங்கிய மாணவர்களுக்காக, கோவையில் அறிவுச்சுடர் ஐ.ஏ.எஸ். அகாடமி தொடங்கப்பட்டுள்ளது.
இதன் தொடக்க விழாவில் டெல்லியைச் சேர்ந்த குடிமைப் பணித் தேர்வுப் பயிற்றுநர் சல்மான் கான், அவரது மாணவரும் குடிமைப் பணித் தேர்வில் சாதித்த மாற்றுத்திறனாளி இளைஞருமான கோவையைச் சேர்ந்த ஏ. அப்துல்லாஹ் அஃப்ரித் ஆகியோர் பங்கேற்று மாணவர்களுக்கும் பெற்றோர்களுக்கும் வழிகாட்டினர்.
அப்போது, பெரிய கல்லூரியில் படிக்க வேண்டும் அல்லது அதிக பணம் செலவிட வேண்டும் என்ற அவசியமில்லை. சரியான வழிகாட்டுதல், திட்டமிட்ட பயிற்சி, விடாமுயற்சி இருந்தால் குடிமைப் பணித் தேர்வுகளில் சாதிக்கலாம் என அறிவுறுத்தினர். நடப்பு நிகழ்வுகளை மனப்பாடம் செய்வதைவிட, அவற்றின் பின்னணியைப் புரிந்துகொண்டு படிப்பது வெற்றிக்கு உதவும் என்றும் தெரிவித்தனர்.
6 மாதங்கள் இலவசப் பயிற்சி
அறிவுச்சுடர் ஐ.ஏ.எஸ். அகாடமி சார்பில் கிராமப்புற மற்றும் ஏழை மாணவர்களுக்கு முதல் ஆறு மாதங்கள் இலவசப் பயிற்சி வழங்கப்பட உள்ளது. இலவசக் கலந்தாய்வு, தேர்வு வழிகாட்டுதல், ஐ.ஏ.எஸ்., ஐ.பி.எஸ். அதிகாரிகள் பங்கேற்கும் கருத்தரங்குகள் மற்றும் மாதிரித் தேர்வுகளும் நடத்தத் திட்டமிடப்பட்டுள்ளது.
ஆறு மாதங்களுக்குப் பிறகு புத்தகங்கள், மின்சாரம் உள்ளிட்ட பராமரிப்புச் செலவுகளுக்காகக் குறைந்த கட்டணம் வசூலிக்கப்படும் எனத் தெரிவிக்கப்பட்டது.
கோவை, வெரைட்டிஹால் சாலை அருகே ஐந்து மூக்கு பகுதியில் உள்ள தேசிய நெடுஞ்சாலையில் அமைந்துள்ள இந்த அகாடமி குறித்த கூடுதல் விவரங்களுக்கு 72001-16111 என்ற எண்ணில் தொடர்புகொள்ளலாம்.
