கோவை,அக்.13: கோவை – மேட்டுப்பாளையம் சாலையில் இரவு நேரங்களில் சட்டவிரோதச் செயல்கள் நடைபெறுவதாக எழுந்த புகார்களைத் தொடர்ந்து, கவுண்டம்பாளையம் பகுதியில் போலீசார் ரோந்துப் பணியைத் தீவிரப்படுத்தியுள்ளனர்.
கோவை மேட்டுப்பாளையம் சாலை மற்றும் அதைச் சுற்றியுள்ள பகுதிகளில் இரவு நேரங்களில் சிலர் வாகன ஓட்டிகளிடம் பேரம் பேசுவதாகப் புகார்கள் எழுந்தன. இதுதொடர்பான வீடியோக்கள் சமூக வலைதளங்களில் பரவியதைத் தொடர்ந்து, அப்பகுதியில் போலீசார் கண்காணிப்பை அதிகரித்துள்ளனர்.
இதன் ஒரு பகுதியாக, கவுண்டம்பாளையம் காவல் நிலைய ஆய்வாளர் கந்தசாமி சம்பந்தப்பட்ட பகுதிக்கு நேரில் சென்று, அங்கு நின்றிருந்தவர்களிடம் எச்சரிக்கை விடுத்தார். ஏற்கனவே பலமுறை அறிவுறுத்தியுள்ளதாகக் குறிப்பிட்ட அவர், இதுபோன்ற செயல்களில் ஈடுபடுவதைத் தவிர்த்து, மாற்றுத் தொழில் வாய்ப்புகளைப் பயன்படுத்திக்கொள்ளுமாறு அறிவுறுத்தினார். இந்தச் சம்பவம் தொடர்பான வீடியோ தற்போது சமூக வலைதளங்களில் பரவி வருகிறது.
